Goierriko Hitza

Goierri osoko baserritarrak Lazkaomendin bildu ziren atzo, bizi duten «egoera larria» salatu eta sektorearekiko sentsibilizazioa zabaltzeko asmoarekin. Produkzio kostuen igoera, betearazten zaien burokrazia eta diru publikoaren «erabilpen okerra» jo dituzte egoeraren erantzule. Horren guztiaren aurrean mobilizatzeko deia egin diete baserritarrei eta gainontzeko herritarrei.

Atzoko agerraldian azaldu zutenez «kinka larrian» daude baserritarrak. Azken 30 urteotan baserritik bizi diren herritarren kopuruak nabarmen egin duela behera adierazi zuten: 1976an 92.000 baserritar zeuden Euskal Herrian; gaur egun 14.000 dira. Bestetik, baserritarren bataz besteko adina gero eta handiagoa da. EHNEk emandako datuen arabera baserritarren %60k 55 urtetik gora ditu.

Goierriko baserritarrek egindako agerraldian Garikoitz Nazabalek azaldu zuenez, «guk defenditzen dugun eredua ez da gaur egun indarrean dagoena. EHNEk bai Euskal Herriko eta bai Gipuzkoako elikagaien subiranotasuna bermatuko duen nekazaritza eredu bat eta nekazaritza politika bat aldarrikatzen ditu, elikagai nahikoa produzituko duena, horiek elaboratuko dituena eta, noski, kontsumitzailearengana iritsaraziko dituena». Eredu berri hori «amalurrarekiko oreka mantenduz eta ingurumena errespetatuz» egin behar dela iritzi diote sindikatuaren ordezkariek.

Lau ardatz nagusi

Nekazarien EHNE sindikatuak lau ardatz nagusitan oinarritu du bere aldarrikapena. Batetik, produkzio kostuek «igoera handia» izan dutela azaldu zuen Nerea Soraluzek. «Gure produktuak prezio berean saltzen jarraitzen dugun bitartean, erosleentzat prezioak igo egin dira. Bitartekari batek hartu du dirua, eta hori salatu nahi genuke».

Bestetik, «gero eta burokrazia eta paper gehiago» exijitzen zaiela azaldu dute baserritarrek. «Gure baserriak bulegoen itxura hartzen ari dira, eta gure lana behar bezala egiteko oztopoa da burokrazia hori dena».

Azpiegitura proiektuen inguruan ere euren kezka agertu dute baserritarrek. «Ikusi besterik ez dago nola Abiadura Handiko Trenaren eta autobideen proiektuak gure lurrak suntsitzen ari diren. Lurrik gabe gelditzen ari gara».

Azkenik, administrazioak diru publikoarekin «erabilpen okerra» egiten ari direla salatu dute. «Badago diru publiko bat gure izenean datorrena, baina beste azpiegitura batzuetara bideratzen da, eta baserritarrak ez du publikoa den diru hori ikusten», adierazi dute EHNEko kideek.

Mobilizatzeko deia

Egoera horren aurrean «sektorearekiko sentsibilizazioa» zabaldu nahi du sindikatuak, herritarrek jakin dezaten zein den baserritarrek bizi duten egoera. Hori dela eta, baserritar guztiei eta herritar guztiei egin diete mobilizazioetan parte hartzeko deia. Igande eguerdian, ekainaren 8an, manifestazioa egingo dute Donostiako bulebarretik abiatuta, Baserria SOS goiburua aurrean hartuta.