Goierriko Hitza

Urola kirol elkarteko futbol saileko zuzendaritzarako hautagaitza aurkeztu zuen atzo Zumarragako kultur etxean Urola Bihotzean plataformak, ekitaldi publiko batean.

Asier Murua buru duen talde horrek argi utzi nahi izan zuen hasi aurretik «azken egunotan entzun diren zurrumurru guztiak ezeztatzen» dituztela. «Gure hautagai zerrendak duen asmo bakarra gaur hemen aurkeztuko ditugunak dira eta horretara etorri gara».

Urola bihotzean plataformak «bazkidearen ilusioa berreskuratu» nahi du eta taldea «berriz ere Gipuzkoan erreferente» izatea.

Talde guztiak mantendu

Aurkezpenarekin batera, oinarrizko futboleko jokalarien gurasoei mezu bat helarazi nahi izan zieten, «zurrumurruen aurrean lasai egon daitezen», talde guztiak mantenduko dituztela esanez.

Urola Bihotzean «hainbat urtetan futbolaren atal desberdinetan, jokalari, entrenatzaile, zuzendaritza batzordeko kide, guraso, eskarmentu handiko elkartearen bazkide talde bat» bezala definitu zuten plataformako kideek. «Gure artean elkartearen inguruan hainbat zalantza eta kezka sortu dira, eta momentu batean gaur egungo zuzendaritzari idatzizko hausnarketa bat helarazi genion. Hor koka dezakegu gure zerrendaren sorrera». Bertan adierazitakoaren arabera, eta atzo azpimarratu zutenez, «ez gara inoren aurkari, baina aginte ziklo bat amaitzen ari dela ikusten dugu. Zuzendaritzari esker ona zor diogu, baina badira zenbait gai, hala nola sailkapenak, elkartetik alde egiten duten jokalariak, kirol planifikazioa, jokalarien hautatze prozesua, pertsona aski prestatuak elkartetik kanpo egotea eta abar, eztabaidagarri iruditzen zitzaizkigunak. Bere garaian aukera hori ukatu zigutenez, gure hautagai zerrenda sortzeko erabakia hartu genuen», azaldu zuten Muruak eta zerrendakideek zaleen aurreko aurkezpenean.

Lehen taldean bajak

Plataformak jokalariei dagokienez azaldutakoaren arabera, «badakigu ez direla soberan egongo. Lehen taldeak baja garrantzitsuak izango ditu eta horren aurrean hainbat talderekin harramanetan jarri gara jokalariak uzteko aukera azter dezaten».

Oinarrizko futbolean planteatzen dituzten ekintzak «Urolaren mesederako» izango direla azpimarratu zuten, elkartea berriro ere Gipuzkoan «erreferente» izan dadin. «Zumarragako eta Urretxuko biztanle kopurua kontuan hartuz gero Gipuzkoan bederatzigarren postuan gaude, baina hori ez dator bat futbol taldeen kokapenarekin; izan ere, futbol mailari begiratzen badiogu, gure herrikoak 26tik 25. postuan daude». Egoera hori aldatzeko lan egingo dutela adierazi zuten plataformaren aurkezpenean.

Urola kirol elkarteko hauteskundeak ostegunean burutuko dira, goizean eta arratsaldean, Zelai Arizti kultur etxean.