Goierriko Hitza

Eiluz, Urola Garaiko gutxitu fisikoen elkarteak antolatuta, Joko Integratzaileen edizio berri bat izango da bihar arratsaldeko bostetatik aurrera, Zelai Arizti parkean. Bertan, Zumarragako Gazte Txokokoek eta gerturatzen diren guztiek parte hartu ahal izango dute. Aurten bi modalitate kaleratuko dituzte, boccia eta slaloma hain zuzen.

Helburua, «gure egoeran egin daitezkeen jokoak ezagutu eta nola egin daitezkeen jakitea da», diote Eiluz elkartekoek, «eta parte hartu dezatela».

Azken urteotan «10-15 urte bitarteko gaztetxoak gerturatu ohi dira joko hauetan parte hartzera, gazte txokokoek badakite nola egiten ditugun eta urtero etorri ohi dira». Ekimena nagusiki adin tarte horri zuzenduta egongo da. Eguraldi txarra eginez gero Euskadi plazako arkupetan egingo dira jokoak. Ekitaldia arratsaldeko zazpiak inguruan bukatutzat emango dute.

Bestalde, irailari begira Kirol Jardunaldi Integratzaileak antolatu dituzte Eiluz elkartekoek, baina «ekimen ezberdinak dira, kirola eta jokoa tartean bada ere, izaera ezberdineko bi atal dira», azaldu dutenez.