Goierriko Hitza

Asteburuan goierritar ugari izango da Sabiñanigo (Huesca, Espainia) eta inguruetanTrepariscos eta Quebrantahuesos txirrindularitza probetan parte hartzeko. Eskualde osoko ehunka txirrindu zaletuk parte hartuko du Pirinioetako etapa gogorrean. Horietako asko Urretxu-Zumarragako Goierri Kirol Elkarteko txirrindulariak dira, eta aurten inoiz baino jende talde handiagoa osatuko dute.

Urretxuko elkartearen bidez, 90 kilometroko Trepariscos egiteko 28 pertsonak eman dute izena, erdiak emakumeak. Duela bi urte jarri zen abian Goierriko emakumeen taldea gero eta indar handiagoa hartzen ari da; iaz taldeko emakume bakarrak hartu zuen parte. «Poliki-poliki hasi zen ekimena baina gaur egun sendotutako taldea da; oso pozik gaude, bai partaidetza aldetik, bai egiten diren irterengatik», azaldu du Goierriko kide Iñaki Urdangarinek. Quebrantahuesos probak 205 kilometroko ibilbidea du. Urretxu-Zumarragatik 45 partaidek eman dute izena. Taldeko bi neskak egingo dute ibilbidea.

Txirrindulariekin doazenak

Parte-hartzaileez gain txirrindulariak ikustera joaten direnak ere asko dira. «Partaide bakoitzeko bataz beste lau-bat lagun joaten dira; hortaz, atera kontuak. Gurean izena eman ez baina bere aldetik doazenak ere badira». Goierrikoek jantzia estreinatuko dute, azken hamar urtean diseinu bera erabilita gero. Jantziak Urbe dendan eskura daitezke eta uda ondoren negukoak salduko dituzte.

Bi probetan 9.500 txirrindularik parte hartzea espero dute antolatzaileek. Iaz, Lagun Onak taldeak izan zuen ordezkaritza handienetakoa , 53 txirrindularirekin. Aurten Goierrik erraz gaindituko du.