Goierriko Hitza

Ainhoa Sanz urretxuarrak eta Alazne Furundarena ordiziarrak egundoko lorpenak eskuratu dituzte asteburuan Gasteizen, Espainiako Atletismo Txapelketan. 3.000 metroko oztopo-lasterketan urrezko domina atera du Sanzek, eta 100 metrokoan zilarrezkoa Furundarenak.

Urola Garaia Auxkal taldeko Ainhoa Sanz oso pozik agertu da garaipenarekin: «Nire marka hobetu nahi nuen, eta lasterketa erraza izan zen. Bigarren itzulirako bakarrik nengoen, baina azkenaldera erritmoa jaitsi beharra izan nuen eta ezin izan nuen marka hobetu».

Uda partean proba bat baino gehiago izango du Sanzek, Tenerifeko absolutuen txapelketan parte hartu ahal izateko. Asteburuan Avilesen (Asturias, Espainia) egingo du korrika.

Furundarenak denboraldiko denbora onduz eskuratu du bigarren postua 100 metroko abiadura lasterketan. 12,15 segundoan geratu zuen kronometroa Txindoki-Jaso taldeko atleta ordiziarrak.

Denbora horrek Polonian jokatuko den Munduko Txapelketan parte hartzeko aukera eman dio, baina ikasketa kontuak direla-eta Furundarena ez da hara joango.