Goierriko Hitza

Zumarragako Udalak eta Eusko Jaurlaritzako Etxebizitza eta Gizarte Gaietarako Sailak Artiz auzoan egingo diren babes ofizialeko 42 etxebizitzen esleipena Etxebideren bitartez egitea adostu dute. Etxebizitza horietatik 21 berkokapenetarako erabiliko dira, eta esleitu beharreko etxebizitzetatik honako kupoak erreserbatuko dira: bi etxebizitza mugikortasuna behin betiko murriztua duten pertsona ezgaituentzat izango dira; 13 etxebizitza 25 eta 35 urte bitarteko pertsonek osatutako bizikidetzako unitateentzat gordeko dira; eta beste sei gainontzeko eskatzaileentzat. Lagapen erregimena jabetzakoa izango da, eta iazko azaroaren 30a baino lehen Etxebiden erregistratutako eskariak hartuko dituzte kontuan. Jakinarazpenak lurralde ordezkaritzen iragarki taulen bidez emango dira jakitera.

Diru -sarrerak

Era berean, onartuak izateko eskatzaileek egiaztatu beharko dute 2006ko urteko jardunaldian diru sarrera 9.000 euro eta 33.000 euro bitartekoa izan zutela. Mugikortasun edo adimen urritasuna duten pertsonen kasuan, gutxieneko 3.000 euroko diru-sarrera egiaztatzearekin nahikoa izango da.

Zumarragan erroldatuta

Artizeko etxebizitzak eskuratu ahal izateko erroldaren baldintza ere bete beharko da. Titularretako batek Zumarragan erroldatuta egon behar du, gutxienez urte betean, atzoko data kontuan hartuta.