Goierriko Hitza

Zumarragako Argixao poligonoan dagoen TTT Goiko enpresako langileak greba mugagabean daude, enpresa-itunaren eta hitzarmenaren inguruan gerentziarekin sortutako akordio eza dela eta.

Langileen arabera lantegian sortutako plataforma batek proposatutako hitzarmena negoziatzen hasi zirenean «atzera bota» zien enpresak proposatutakoa. «Hiru puntu aurkeztu zizkigun gerentziak, kontratuen indarraldia, orduen gutxitzea eta ordainsarien ingurukoak. Bi lehenek negoziaziorako tarterik ez zutela eskaintzen adierazi ziguten». Grebarako deialdiaren aurrean, «itunaren iraupenean aldaketa batzuk eta ordainsariena aztertuko zutelakoan gelditu ziren baina tarte horretan behin-behineko langile bat kaleratu zuten. Gure ustez kaleratze horrek egoera honekin harreman zuzena dauka, eta horregatik orain lan hitzarmenaz gain langile horren lanpostua aldarrikatzeko ere bagaude greban», diote langileen ordezkariek.

Elkarretaratzea

Bestetik, greban dauden langileek salatu dutenez «istiluak egon izan balira bezala» Ertzaintza etorrarazi dute lantegiko arduradunek. «Etorri ziren modu berean alde egin behar izan zuten, protesta baketsuan ari gara eta». Bergarako egoitzan ere elkarretaratzea egiten dute egunero. «Gerentziaren komunikazio eza» salatu eta «egoerak bere horretan» jarraituz gero greba jarraitzeko asmoa dute.