Goierriko Hitza

Atzo egindako udalbatzar berezian Anton Arbuluk uko egin zion alkatetzari, eta horrenbestez Zumarragako alkate kargua utzi du, FEVE enpresan lanean hasi behar duelako lanean. Azkenaldian zurrumurru ugari bazebilen albistearen inguruan, baina udalbatzarrerako osteguneko deialdian jakin zen udal ordezkarien artean.

Atzoko ekitaldian Arbuluk uko egitearekin batera, Udalbatzak horren berri jakin eta alkate berria aukeratzeko prozedura hasi zen martxan. Momentu honetan Mikel Serrano da jarduneko alkate, lehen alkateorde bezala zegokiolako. Datozen hamar egunotan beste udalbatzar berezi bat deitu beharko du, alkate berria aukeratzeko. Alkatetzari uko egiteak ez du zertan zinegotzi izateari uko egitera behartzen. «Momentuz» zinegotzi jarraituko du Arbuluk.

Udal idazkariak legezko prozedura bete eta gero, Arbuluk hartu zuen hitza. «Nire herria hiru legealditan zerbitzatu ondoren etapa berri bati ekingo diot nire bizitzan». Herritarrei, zinegotziei (bereziki PSE-EEkoei), eta gainontzeko alderdietako kide eta funtzionarioei eskerrak eman zizkien «emandako laguntzagatik eta egindako lanagatik». «Politika gaien gainetik bizikidetza dagoela ikasten lagundu didatenei ere eskerrak eman nahi dizkiet. Zumarragan jaio, Zumarragan bizi eta bertan jarraituko dut herria zerbitzatzeko bokazioarekin».

Deialdia

EAJko bozeramaile Juanjo Sagarnak «deialdiaren urgentzia dela eta harrituta» zeudela adierazi zuen. Alkate bezala, «EAJrekiko leialtasun falta eta informazio eta komunikazio gabezia» gaineratu zizkion Arbuluri. Dena den, ibilbide berrian «onena» opatu zion. Valeriano Martinez PPko bozeramaileak ere hitza hartu zuen, «elkarrekin lan asko egin dugu» azpimarratuz. «Hala jarraituko duzulakoan nago eta zorionak egindako lan onagatik».

Azalpenak

Ikerne Badiola EAko bozeramailea ados zen Sagarnarekin deialdiaren bat-batekotasunagatik. «Kalean izan diren zurrumurruen aurrean azalpen gardenago bat nahiago genukeen», esan zuen.

Mikel Serrano PSE-EEko bozeramailearentzat «egun berezia» zen atzokoa, eta entzundakoak esateko egunik egokiena ez zela adierazi zuen. «Deialdi berezia egiteko garrantzizko gaia dela uste dut». Zortea opatu zion Arbuluri.

Arbuluk eskerrak eman zituen berriz. «Elkar ikusiko dugulakoan nago» hitzekin bukatu zen bilkura.