Goierriko Hitza

Aste honetan pasa berri diren Santa Isabel jaien balorazioa egin dute antolatzaileek eta orokorrean, positiboa izan da. Santa Isabel eguna asteazkena izanik ohi baino gehiago luzatu dira jaiak, baina ekitaldi aldetik orekatua egon da.

Alderdirik positiboenen artean, Zelai Arizti parkean lortu den espazio berria azpimarratu zen, kultura eta jai batzordetik adierazitakoaren arabera. «Dantza erakustaldia eta dantza libreko txapelketa bertan egin ziren eta jende ugari gerturatu zen. Esertzeko toki erosoak ere badu zerikusirik honetan eta bi ekitaldiak bi egunetan banatzeak ere bai».

Bestalde, zezen plazan antolatutako ekitaldiek oso harrera ona izan dute. «Publiko aldetik oso arrakastatsuak izan ziren eta orokorrean oso balorazio positiboa egin dugu».

Ohi bezala, Santa Isabel egunean sortzen diren jende pilaketek eztabaida sortu dute aurten ere; izan ere, meza bukatzerakoan elizako eskailerak hustutzea ez baita erraza eta horrek ere arazoak sortzen ditu.

Txosnei dagokionean, «aurten musikaren bolumena eta ordutegia dela eta hainbat kexa egon dira, beraz, hori jakinarazteaz gain datorren urterako hori gertatu ez dadin beharrezko neurriak hartuko dira».

Azkenik datorren urtean Santa Isabel eguna osteguna izanik, «jaien hasera asteazkenean izatea proposatu zen. Honela, helduen daborrada bera, asteazken gauean izango litzateke eta hortik aurrera gainontzeko ekitaldiak. Dena den oraindik badago denbora horretaz hitzegiteko».