Goierriko Hitza

Irailaren 13an izango dira Urretxuko IX. Kirol Jardunaldi Integratzaileak Gernikako Arbola plazan. Ohi bazala, eguraldi txarra eginez gero Aldiri kiroldegira aldatuko dute bilgunea. Urola Garaiko gutxitu fisikoak biltzen dituen Eiluz elkarteko kide Joxe Jauregiren arabera, «aurtengoan jardunaldiak berritu egin ditugu, eta zirkuitu bat egin dugu joko desberdinekin». Berritasun horren helburua parte-hartzea sustatzea da. «Gazteek parte har dezaten bultzatu nahi dugu, helduak ahaztu gabe».

Jardunaldiak Urretxuko Udalak antolatzen ditu, Eiluz elkartearen laguntzarekin besteak beste. Aurtengo jardunaldien ardatza parte-hartzea izanda, Gizarte Zerbitzuetako zinegotzi Marian Ostizak agertu duenez «ikastetxeetara gutunak bidali ditugu bertako ikasleei jardunaldietan parte hartzeko gonbitea eginez».

Osatu duten zirkuitu horretan hamar joko egin ahalko dira: slalom-a, saskibaloia, dardoak eta boccia adibidez. Partaide guztiek hamar jokoak egingo dituzte; amaitzean sari bat egongo da guztientzat. «Lehenengo nor iristen den ez da garrantzitsua izango».

Jardunaldien iragarki-kartel lehiaketako irabazlea Sopelako Iratxe Maruri izan da.