Goierriko Hitza

Larunbat honetan Zuhaitzaren Soinua Kolektiboak (ZSK) Urretxun eta Zumarragan ospatuko du laugarren Txalaparta Eguna. Lau urtero egin ohi den festa da, eta Euskal Herriko txalapartariak bilduko dira Urretxuko jaian. 1992an sortu zen ZSK taldea, eta 1996.an antolatu zuten lehenendabiziko aldiz Txalaparta Eguna . Ordundik lau urtez behin ospatu da, Olinpiar Jokoen urte berean.

Ez da egun hori hala ere, ZSK-k aurten aurrera eraman duen ekimen bakarra. Otsailetik ekainera ikastaroa eskaini zuten; udaberrian ikastetxeetan aritu ziren 3. DBHkoei txalapartaren gaia gerturatzen; eta, azkenik, ekainaren 20an Txalaparta Gaua ospatu zuten Antion, arrakasta handia izan zuena. Urtea borobiltzeko, larunbatean IV. Txalaparta Eguna ospatuko dute Euskal Herri osotik etorritako txalapartariekin batera.

Egun guztian ekitaldiak

Egun osoko egitaraua prestatu dute aurtengo festarako. Eguerdiko hamabietan hasiko dute eguna, Urretxuko eta Zumarragako kaleak zeharkatuko dituen kalejirarekin. Batukadaren laguntzaz eta txalapartak sorbalda gainean hartuta, bi herrietako kaleetan barrena zuhaitzaren soinua barreiatuko dute txalapartariek. Era berean, goiz osoan zehar hainbat artista horma-irudiak margotzen ariko dira Areizaga-Kalebarren enparantzan, eta 13:00etan sagardo dastaketa hasiko da leku berean. Horrekin batera, txalaparta saio libreak eskainiko dituzte, eta nahi duenak jotzeko aukera izango du.

Arratsaldean sagardo dastaketa eta txistor jana izango dira Urretxuko Abenidan, trikitilariek girotuta. Bertan inguruko herrietako txalapartazaleak ere izango dira, eta berriro ere nahi duenak txalaparta zein danborrak astintzeko aukera izango du.

Euskal Herriko txalapartariak

Afalostean txalaparta jaialdia ospatuko da Iparragirre plazan. Jaialdirako Euskal Herriko hainbat lekutatik etorritako txalapartarien laguntza izango dute. Han izango dira: Mendiaraz anaiak (Urretxu), Harresian Zulo (Gasteiz), Zugarramurdi taldea (Sestao, Bizkaia), Irungo txalapartariak, Baigorriko txalaparta taldea (Nafarroa Beherea), Jo Ala Jo kultur elkartea (Baztan, Nafarroa) eta Zuhaitzaren Soinua Kolektiboa hain zuzen ere. Euskal Herriko herrialdeen sei harmarriak ordezkatuko dituzte talde horiek.

Antolatzaileek, hala ere, txalapartariez gain jaialdian parte hartuko duten beste protagonistak ere azpimarratu nahi izan dituzte, musika eta kultur munduko hainbat pertsona ere bilduko baitira: albokariak, abeslariak, trikitilariak, dultzaineroak, tobera jotzaileak, bersolariak...

Txalaparta Egunarekin lotuta, ZSK-ko kideek erakusketa ireki dute Urretxuko Juan de Lizarazu aretoan. Irailaren 5etik 14ra bitartean izango da ikusgai Enbor Zaharra, adar berria, adaskak izenpean, eta Zumarraga-Urretxun txalapartak izan duen ibilbidea ikusteko parada ezin hobea eskainiko du.

Izenburuan hiru atal bildu nahi izan dituzte: Enbor zaharra txalapartaren gaia bera da; adar berria Zuhaitzaren Soinua Kolektiboa, txalapartaren munduko adar berria; eta adaskak eskoletan txalaparta ikasi duten ikasleak, gerora begira taldearen etorkizuna izan daitezkeenak. Hori horrela, erakusketa hiru zatitan banatzen da. Batetik material didaktikoa dago, txalapartaren gaia azaltzen duena. Bigarren ZSKren historiako argazkiak bildu dituzte; azkenik 3. DBHko ikasleek eginiko sormen lanak ere badaude ikusgai.

3. DBH-ko ikasleei ikastaroak ematen

Udaberri aldera Zuhaitzaren Soinua Kolektiboko kideak ikastetxeetan izan ziren 3. DBHko ikasleei txalapartaren mundua gerturatzeko. Zazpi ikasgelatan aritu ziren ZSK zer den eta zer egiten duen azalduz; txalapartaren historiaz jardun ziren batetik, eta ikasleek instrumentuarekin ordu erdiz esperimentatzeko aukera ere izan zuten bestetik.

Horrez gain, ikasle bakoitzari zerbait sor zezaten eskatu zieten, norberak nahi zuen forman. Lan horiek guztiak Juan de Lizarazu aretoan dagoen erakusketan sartu dituzte. Bestalde, ikasleen artean gaiari buruzko inkesta bat ere banatu zuten, eta kaleratutako ondorioak erakusketa berean daude irakurgai. Bildutako mezuen artean «ez diot txalapartari ezer interesgarririk aurkitzen» moduko iritziren bat aurki daitekeen arren, orokorrean ikasleek ikastaroa gustura hartu zutela ikus daiteke.

 

txalaparta eguna

Txalaparta Eguna larunbat honetan, irailak 13, ospatuko da.

12:00. Txalapartarien eta batukadaren kalejira Urretxuko eta Zumarragako kaleetan barrena.

13:00. Sagardo kupela Areizaga-Kalebarren enparantzan.

18:30. Sagardo dastaketa eta txistor jana, Urretxuko Abenidan.

22:30. Txalapartarien jaialdi erraldoia Joxe Mari Iparragirre plazan, Euskal Herri osotik etorritako txalapartariekin.

 

 

Jasotako erantzunak:

Mezua idatzi

Parte hartu | Zure mezua bidali

Izena:

e-posta:

Izenburua:

Mezua:

Aurreko kodea kopiatu:

Parte hartzeko arauak

1. 1. - Saiatu zure artikuluak izen-abizenekin sinatzen. Indar handiagoa du.
2. 2. - Iritzia anonimoki eman nahi baduzu, baduzu horretarako aukera ere. Kontuan hartu ondokoak:
   * Ez pertsonala. Pertsona bati buruz ari garenean zehazki, kritikatzeko edo famatzeko, anonimoek ez dute balio. Eta, kasu honetan, pertsona fisikoez ari gara, ez entitate juridikoez.
   * Entitate juridikoez anonimoki aritu daiteke, baina pertsonalizatu gabe, eta talante eta errespetu onean; iraindu gabe, doako akusaziorik egin gabe... errespetuan.
   * Aurreko gauza bera gai orokorrez idatzi behar denean ere.
   * Norbaitek pertsonalki sinatutako iritzi bati, pertsonalki erantzutea dagokio, eta ez anonimoki.
3. 3. - Dena arautzea ezinezkoa da, batez ere hau bezalako webgune batean. Mesedez, denon zentzu ona eta kolaborazioa eskatzen ditugu. Apenas izango den logika bezalako arautzaile zuzenik kasu hauetan.