Goierriko Hitza

Migel Cristobal (Urretxu, 1961) Urretxuko Aldiri kiroldegiko teknikaria da. Goierri Garaia Atletismo taldeko kide bezala lehenengo ediziotik parte hartu du Herri Lasterketaren antolaketan.

Zenbat jende biltzen du lasterketak?

Hirurehun eta berrogeita hamar bat lagun. Euskal Herri osotik etortzen dira, baita kanpotik ere.

Nola sortu zitzaizuen horrelako lasterketa bat antolatzeko ideia?

Horrelako lasterketek jende andana elkartzen zuten garai hartan. Gainera, Behobia-Donostia lasterketaren atarian, aurrekoa prestatzeko baliagarria izango zen.

Eta egitasmoak arrakasta izan zuen.

Bai, gure helburua goierritarrei urrutira joan gabe horrelako lasterketa batean parte hartzeko aukera ematea izan zen, eta bete dugula uste dut.

Hasiera batean Legazpi ere sartuta zegoen ibilbidean.

Bai, baina arazoak sortzen zizkigun errepidera atera beharrak, eta duela lau bat urte zirkuitua Urretxuko eta Zumarragako hirigunean egitea erabaki genuen.

Luzeagoa ere bazen lehen, ezta?

Hamabi kilometro eta erdi zituen lehen, eta orain ibilbidea hamar kilometroan utzi dugu. Hirigunean parte-hartzaile batzuek besteak bikoizteko aukera gehiago sortzen da, eta horregatik kilometroak gutxitu genituen.

Lan handia al da horrelako lasterketa bat antolatzea?

Ekainean hasten gara lanean. Nolanahi ere aurten lasterketa aurreratu egin dugu, Behobiatik hurbilegi zegoelako.

Parte-hartzaile gehienek Behobia prestatzera datozela esango zenuke?

Bai, litekeena da.

Egingo al duzu zuk?

Beti egin izan dudan arren, aurten oraindik ez dut dortsalik eta ez dakit egingo dudan.