Goierriko Hitza

Igande honetan Zumarraga-Urretxuko lehenengo mendi martxa izango da. Partehartzaileek Belokiko Gurutzearen gaina eta Irimoko tontorrak igo beharko dituzte. Lasterketa, orain gutxi sortu den Goierri Garaia mendi lasterketa taldeak antolatu du bi herrietako Udalen babesarekin eta hainbat boluntarioren laguntzarekin.

Aurreko larunbatean Goierri Garaia atletismo taldeak antolatutako krosa izan zen. Igandeko mendi lasterketan parte hartzen dutenek challengea izeneko saria irabazteko aukera izango dute. Sari hau, hirigunean egindako krosa eta igandeko mendi lasterketa egiteko denborarik gutxien behar duen korrikalariak jasoko du.

Igandeko mendi lasterketa Areizaga-Kalebarren plazan hasi eta bukatuko da.

Izen-ematea igandean bertan

Goizeko hamarrak eta erdietan hasiera emango diote mendi martxari eta lasterketan parte hartzen dutenek Belokiko gurutzera igo beharko dute lehenik eta behin. Gurutzea inguratu eta gero, herrigunerako bidea hartuko dute, berriz ere Areizaga-Kalebarren plazan izango den tarteko helmugatik igarotzeko.

Handik Irimorako igoerari ekin beharko diote Santa Barbarako baselizako bidea hartuz. Irimotik atzera hirigunera jaitsiko dira eta Areizaga-Kalebarren plazan bertan izango dute lasterketaren helmuga.

Lasterketarako izena egunean bertan eman beharko dute partehartzaileek. Zortzi euro ordaindu beharko dituzte, goizeko bederatzietatik aurrera jarriko duten izena emateko gunean. Gune hori ere, Areizaga-Kalebarren plazan izango da.

Partehartzaile bakoitzak elastiko bana jasoko du doan eta lasterketako antolatzaileek eskainiko dituzten zerbitzu guztietaz baliatu ahal izango dira: dutxak, anoa postuak etabar.

Amaieran mokadu bat

Irimoko gainetan hornidura likidoa emango zaie korrikalariei eta Areizaga-Kalebarreneko tarteko helmugan, hornidura solidoa. Lasterketa amaitzen dutenean «mokadu goxoa egiteko aukera izango dute partehartzaile guztiek» dio Gorka Azkarate Goierri Garaia mendi lasterketako kideak. «Aipatu behar da maila handiko zenbait korrikalari igandean Zumarraga-Urretxun egongo direla esan dietela dagoeneko antolakuntzako kideei».