Goierriko Hitza

Garapen bidean dauden herrialdeetan lankidetza programak finantzatzeko dirulaguntzen 2008ko deialdia abiarazi du Urretxuko Udalak. Betiko moduan, dirulaguntza hauek herrialde pobreetako biztanleen baldintza sozio-ekonomikoak garatzeko bidean proposatutako jarduerak egin ahal izateko edota hondamendiak sortutako kalteei aurre egin ahal izateko emango dituzte.

Gobernuz kanpoko edozein erakundek eskatu ahal izango ditu hauek, beti ere nortasun juridikoa baldin badu, irabazi asmorik gabekoa baldin bada eta bere jarduerak deialdi honen xedearekin bat etortzen badira.

Aukeraketa irizpideak

Dirulaguntzak ematerako orduan, hainbat faktore izango dira kontuan. Batetik proiektua laguntzaren xede den herriaren garapen-gaitasuna handitzeko izatea baloratuko da, onuradunek ekimen horretan parte hartu dezaten bultzatuz. Bestetik, herrialde azpigaratuetako biztanleen garapen ekonomiko eta sozialaren premiei zuzen zuzenean erantzutea hartuko da kontuan eta baita proiektuak biztanleen artean sektore baztertuenen aldeko diskriminazio positiboa eragiteko neurriak edukizea. Alde honetatik, emakumeei eta txikienei zuzenduriko proiektuek izango dute lehentasuna. Honez gain, baldintza gehiago ezartzen dira, www.urretxu.net webgunean zehazten direnak.

Eskaria egiteko bete beharreko orria ere weborrian aurkitzen da eta bertan zehazten dira jarraitu beharreko gainontzeko pausuak. Eskariak aurkezteko epea urriaren 29a arte izango da zabalik eta Urretxuko Udaletxean entregatu beharko dira hauek.