Goierriko Hitza

Hainbat hedabidek elkarlanean sortutako 'www.iragarkilaburrak.com' webgunea aurkeztu dute; egunero milaka bisitari eta astero 100.000 aleko zabalkundea du euskarazko iragarki laburren atariak.

Euskarazko iragarki laburren atariak biltzen dituen webgunea aurkeztu zuten atzo Donostian hainbat hedabidetako arduradunek.

Ekainean, tokian tokiko hainbat herri aldizkarik, egunkarik eta agerkarik, euskarazko iragarki laburren webguneak sortu zituzten, eta orain, azken hilabeteotan proiektuarekin bat egin duten kide berriekin batera, guztiak batzen dituen webgune nagusia aurkeztu dute: www.iragarkilaburrak.com

Ehunka iragarki aurki daitezke bertan, hainbat ataletan sailkatuta, nahi dena erraz aurkitzeko bilatzaile garatuekin, eskaintzaren, prezioaren, lekuaren eta beste hainbat aldagairen arabera.

Elkarlanak sortutako sarea

EKTren baitako Bertako Hedabideek garatu dute proiektua, eta bertako zuzendari Iban Arregik aurkeztu zuen atzo webgunea, Donostiako Doka kafe antzokian egindako agerraldian.

Arregiren hitzetan, «euskarak internet bidezko iragarki laburren merkatuan ere egon behar zuen, eta hutsunea ikusita, horri ekin genion, beti ere sare zabala lortzeko modu bakarra elkarlanean aritzea zela ikusita». Ildo horretan, «aurretik herri aldizkariek eta egunkariek egindako bideari beste urrats bat gehitu nahi izan zaio orain, denak sare bakar batean bilduz». Arregiren arabera, «zenbait proiektu aurera ateratzeko elkarlana beharrezkoa da, eta hau adibide nabarmena da. Bide honi ezingo genioke ekin atzean herri aldizkariak eta elkarteak, eskualdetako egunkariak eta agerkari digitalak ez baleude. Horiek urteetan egin duten lana gabe, hau ezinezkoa litzateke».

Aurrean hainbat elkarte, aldizkari, egunkari eta hedabideetako ordezkariak zituela nabarmendu zuen hori Iban Arregik. Bertan ziren, besteak beste, Barren, Eta Kitto, kazeta.info, Goienkaria, Berria, Txintxarri, ukberri.net, Uztarria eta zazpi Hitza egunkarietako zuzendariak eta ordezkariak.

Herri komunikabideek lehendik egindako bidea

Horien artetik, Goienkaria-ko eta Berria egunkariko zuzendariek hartu zuten hitza, Eneko Azkaratek eta Martxelo Otamendik, hurrenez hurren.

Herri komunikabideek lehendik ere iragarki laburren merkatuan egindako bidea nabarmendu zuen Eneko Azkaratek. Zehazki, Goienkaria-k euskarazko iragarki laburrak bilduz eta argitaratuz zortzi urte daramatzala eta urte horietan guztietan irakurleak iragarkiak euskaraz jartzera eta ikustera ohitu direla gogoratu zuen.

Elkarlana

Hori entzunda, Berria egunkariko zuzendari Martxelo Otamendik, zoriondu egin zituen «lehen belaunaldiko, bigarren belaunaldiko eta hirugarren belaunaldiko gurasoak», eta egitasmo honen garrantzia, euskararentzat esparru berriak zabaltzeaz gain, euskarazko hogeita hiru komunikabide elkarlanean aritzeko elkartu izana dela esan zuen. «Ez dut uste gaurkoa bezalako argazkirik erakusteko gai izan garenik».

Ildo horretan, iragarki laburren azokaz haratago, etorkizunean ere elkarlanean urrats berriak egiteko beharra nabarmendu zuen.