Goierriko Hitza

Urretxuko Udalak herriko taberna bat ixteko agindua eman du, «araudia ez betetzeagatik». Hilabeteko epean eduki beharko du arduradunak taberna itxita.

Itxiarazi duten taberna Abenida kalean dago, eta jabearen aurka irekitako zigor-espedientea ebatzi ondoren hartu du Udalak taberna hilabetez ixteko erabakia.

«Arau hauste larriak egin izana egozten zaio Avenida tabernaren jabeari: lokaleko sonografo-erregistratzailearen datuak ez ematea edo ezkutatzea, eta aurtengo martxoaren 11n Udalaren eginkizun ikuskatzailea oztopatzea», adierazten du Udalaren ebazpenak.

Urretxuko beste taberna bat ere oharra jasota dago, baina oraindik ez du Udalak erabakirik hartu, alegazioak aurkezteko garaian dagoelako oraindik. Alegaziorik aurkeztuko balitz, horiek aztertutakoan emango du azken ebazpena.

Zarata-maila zaindu

«Udalaren borondatea Urretxuko herritarren aisialdia eta atseden eskubideak ahalik eta ondoen uztartzea da, eta ahalegin horretan jarraituko dugu. Herriko ostalaritza establezimenduen ordutegiak eta zarata-maila zainduz eta herriko jai-giroa mantentzearen aldeko apustua egin dugu», adierazi dute Urretxuko Udaletik.

Gauzak horrela, taberna hilabetean itxita egongo da.