Goierriko Hitza

Ekintza «sinbolikoa» egin dute egunotan Oiangu Bizirik eta Publikoa elkarteko kideek Oianguren parkean. Jatetxeko isuriak parkeko lurretara botatzen dituen isuri-hodia «estali» dute. «Ekintza legala da, administrazioak aspaldi egin beharrekoa», dio elkarteak bidalitako prentsa-oharrak. Oiangu Bizirik eta Publikoa elkarteak salatu duenez, «urteak» dira hodi horren erabilerak ez duela legea betetzen. «Isuri guztiak parkeko lurretara botatzen ditu gainera».

Oianguren jatetxea «isuri baimenik gabe lanean» ari dela nabarmendu dute Oiangu Bizirikeko kideek, eta baimen eza hori Eusko Jaurlaritzako Lurralde Ordezkaritzak iaz salatu zuela gogoratu dute. «Administrazioak legearen aurrean hartzen duen jarrera diskriminatzailea salatu nahi izan dugu ekintza sinboliko horrekin», dio Oiangu Bizirik-eko zenbait kideren izenean helarazitako prentsa-oharrak.
Oiangu Bizirik eta Publikoa elkarteko kideak «kezkatuta» daude Oianguren parkeko aisialdi guneko proiektuarekin, eta honako galdera egiten dute: «Nola fida gaitezke golf proiektuak ingurumen legeak beteko dituela, jakinda nola altxatu duten golf praktikarako eraikina, eta nola baimendu duten isuri-hodi horren erabilera?».
Ordiziako Udalak «isurien auziari behar bezala» ez heltzea ere kritikatu dute, eta hori dela eta, beste galdera bat egin dute: «Nork ziurtatzen digu egingo den proiektu berri horrek gutxieneko ingurumen bermeak beteko dituela?».