Goierriko Hitza

Areizaga-Kalebarren plazako eszenatokiari azken ukituak ematen ari dira jada. Irailaren 14an inauguratuko dute, eguerdiko 13:45 inguruan. Egun horretan ekitaldi ugari izango dira bai Urretxun eta bai Zumarragan: hala nola, Urretxuko jubilatuen eguna, Belokiko Eguna, Herrien Eguna, artzain txakur erakustaldia, Goierriko Itzulia eta motorzaleen kontzentrazioa. Horiekin guztiekin batera Zumarraga eta Urretxu herrien muinean dagoen eszenatokia ofizialki inauguratuko dute.

Segurtasuna

Eszenatokiak irisgarritasun arauak bete ditzan azken ukituak ematen ari dira. Lurraren eta oholtzaren arteko 70-80 zentimetro inguruko maila gainditzeko eta segurtasun arauak betetzeko eskailera moduko batzuk jarriko dira. «Haurren segurtasuna eta bertara igotzen direnen erosotasuna bermatuko da», adierazi du Zumarragako alkate Mikel Serranok.

Lanak udaren hasieran jarri ziren abian, eta esandako garairako bukatuko da, udako aste gehienetan lanean jarraitzea aurreikusi zelako. Mendiola enpresa arduratu da eraikuntzaz; abuztuko azken astean ekin zioten berriro lanari.

Azpiegitura berria Urretxuko eta Zumarragako udalek ordainduko dute, bakoitzari dagokion ohiko portzentaian. 80.000 euroko aurrekontua du guztira. Azken hilabeteotan Areizaga-Kalebarren plazak jasan duen eraldaketa bukatuko da obra horrekin, eta hemendik aurrera ikuskizun, kontzertu, emanaldi edota sari banaketak Areizaga-Kalebarrengo kioskoan egin ahal izango dira.